Линь Шянфу хэмээх хойд нутгийн эр өмнөд зүгийн Вэн хотыг насан туршдаа хайна. Угтаа хаана ч оршдоггүй, гагцхүү Линь Шянфугийн төсөөллийн хот. Гэхдээ Шянфу хайсан хотоо олсон ч эцсийн зорилго нь биелэхгүй. Вэн хотоос олж уулзах учиртай авааль гэргий, охиных нь ээж Шиао Мэй 18 өдрийн их цаснаар бараг түүний нүдэн дээр үхнэ. Үй Хуа энэ их цасны санааг Чин гүрний Кансигийн үед Тайху нуурын орчимд 40 өдөр цас орсон гэдэг архивын баримтаас ургуулжээ. Зохиолд гарах энэ мэт олон үйл явдлын санааг архиваас авснаа дурссан байдаг.
Зохиол Чин гүрний төгсгөл үе, бүгд найрамдах улс байгуулагдахын эхэн үеийн дотоод, гадаадын дайсан хөлхөлдсөн, дайн дажинтай, үймээн самуунтай ороо бусгаа цагт өрнөдөг. Зохиолын баатарт зовлон зүдгүүр, бэрхшээл хүндрэл хэрээр дүр домгийн шинжтэй, хэв маяг, ааш араншин нь машид тодорхой болдогчлон гол дүр Шянфу дэндүү сайхан сэтгэлтэй, дэндүү уужуу, дэндүү романтик, дэндүү өршөөмтгий. Харин Шиао Мэйн дүр сайн, муу гэж аль нэг талд багтааж боломгүй сэтгэл санаа, ааш зан дэгэлзэж хэлбэлзсэн учир энгийн бидэнтэй илүү ижилхэн, илүү ойр, зөвтгөж буруутгахын эцэсгүй дүр. Хятад зохиолд ажиглагддаг эмгэнэлт шинж их байх тусам ид шид, домгийн шинжээр түүнийг давж гарч, романтик болгодог уламжлал ч зохиолын төгсгөлд давтагдана. Шянфугийн шарилыг хойд нутаг руу нь буцаах замд насаараа хайсан эхнэрийнх нь булштай таардаг нь үүнийг гэрчлэх мэт.