Эдийн засагчдын сэтгэлгээ, эдийн засгийн бодлого, улмаар дэлхий дахины чинээлэг байдалд Адам Смитийн бичсэн Үндэсний Баялгийн мөн чанар, учир шалтгааны талаарх судалгаа зохиолоос илүү нөлөөлсөн ном байхгүй.

Адам Смит зах зээлийн эдийн засаг бол ядуурлаас ангижрах хамгийн сайн тогтолцоо гэдгийг энэхүү номоороо нотолсон.
Эдийн засаг гэхээр манайхан нэгэн янзаар туйлшруулан ойлгох нь бий. Түүнийг энгийн хүн ойлгохын аргагүй нарийн мэдлэг бөгөөд их дээд сургуулийн багш, эрдэмтэн мэргэд л учрыг нь олдог, дор хаяж их дээд сургуулийг “эдийн засагч” мэргэжлээр төгссөн хүмүүс л баримжаалах хэмжээний эрдэм ухаан хэмээн сүрдэнгүй харах нь байдаг.

Үнэн хэрэгтээ эдийн засгийн ухааны ямар ч ном сургаалыг сөхөж үзээгүй сая сая, тэрбум тэрбум хүмүүс л эдийн засгийг бүтээж байдаг. Мянга мянган жилийн тэртээ, эдийн засгийн ном байтугай бичиг үсэг гараагүй, бичиг үсэг байтугай хэл яриа ч олигтой төлөвшөөгүй байсан үедээ ч хоол хүнсээ нөөцөлж, агнах олборлох төлөвлөгөө зохиож, хураасан зөөснөө зохистой хуваарилах зэргээр эдийн засгийн бичигдээгүй хуулинд захирагдан амьдарч иржээ.