...Үүнийг намайг сонсох тэр нэгэн цагт Бурхан багш гүн номын ариун орон Тас цогцолсон хэмээх ууланд өнгөрсөн, одоо, ирээдүй цагийн олон мянган бурхад, бодисадва, махасадва нар болоод газар, тэнгэр, лусын эзэд хаад нартай хамтдаа заларсан билээ. Тэд бүгдээрээ ариун шагшаабадад сайтар гэгээрсэн, Бурханы номын чанадын хязгаарт хүрэгсэд байлаа. Тэд бүгдээрээ цог жавхлан сүр хүчээрээ бүхэнд алдаршсан хичээнгүйг эрхэм болгосон билээ. Нисванис бүгдийг ялж дийлэх уран арга ухаанд тэд мэргэшсэн. Тэд бүгдээрээ тэрсүүдийн омгийг даран номхотгогч, амьтан бүхэнд дээдийн дээд тусыг олгогч тэвчээр төгс, асрахуй төгс билээ. Тэд бүгдээрээ их нигүүсэхүй сэтгэлд баттай оршсон ирээдүйд, хязгааргүй их нигүүсэл-д тангаргыг өргөгсөд байлаа. Тэд БИ-гийн үзэл, бардамнал, ихэрхэл, хийрхэл болоод бусад олон муу явдлыг машид хэтэрсэн хоосон чанар-ыг илтэд танин мэдсэн бөлгөө. Тэд Бурхан багшийн өлмий доор мөргөн Бурхан багшийг гурвантаа тойроод нэгэн зүгт сууцгаав. Тэд алгаа хавсран сууж Ялж төгс нөгчсөн Бурхан багш Шагжамунигийн нигуурыг үзэж дээдийн номын зарлигийг болгоон залбирав.
Тэгээд Ялж төгс нөгчсөн Бурхан багш чуулсан олон нөхдийг болгоож ийн номлов.
Судрын аймгийн дээд эрхэт хаан Алтангэрэлт. Энэ номын учир нь ариун. Утга нь ариун. Хамаг нүгэл хилэнцийг арилгах ханьцашгүй дээд номлол билээ. Аливаа амьтны зовлонг нимгэлж жаргаланг би өгүүлсүгэй. Хатуу гашуун зовлонд нэрвэгдсэн, амьдрах нас богиноссон, барагдсан хийгээд аюул, үгүйрэл, хоосрол, хараал зүхэл болон хилэнцэт муу үйлийн зовлонд нэрвэгдсэн тэд бүгдээр судрын дээд үүнийг сонсож уншиж түгээгтүн. Машид угаагдан ариусах болно. Тиймээс судрын дээд Алтангэрэлт судар үүнийг сонсож үйлд.
Тэвчээр төгс баттай хүсэж буянт сайн сэтгэлийг санаж үйлд.
Авралт судар үүний сүр хүчээр хорлол, зовлон гачаал, аюул тэтгэр энэ мэт тэдгээр муу үйлс явдлууд ашид амирлах болно.
Бурхад, бодисадва, махасадва нар болоод эрх дархат эзэд ноёд, газар уул ус тэнгэр лусын хаад тэд бүгд энд цуглаж өдөр шөнө алгасалгүй олдохуйяа бэрх энэ номлолыг сонсож, цааш цааш нь түгээж номлосугай хэмээн зарлиглав. Эл судрыг уншиж сонсож, түгээж хураасан буянд тоо үгүй. Хязгаар үгүй. Түүнийг хэмжиж жишиж чадахгүй. Хоёр биш, гурав биш, тав биш, арав биш найман түм найман мянган бурханы таалалд нийцүүлэн буяныг үйлдсэнтэй тэнцэнэ хэмээн зарлиглав.
Өнгөрсөн, одоо цагт заларсан хамаг Бурхад бодисадва хийгээд лусын хаад, тэнгэрийн хөвгүүд Бурханы олон шавь нараа гээд Ялж төгс нөгчсөн Бурхан багш шүлэг үүнийг номлов.
Монгол
